لە زۆر کایەی زانستیدا جیاوازیی ئەکرێت لەنێوان ئەم دوو چەمکەدا. ئەڵبەتە لەزمانی ڕۆژانەدا ئەم دووانە وەک هاوواتا بەکاردێن. جیاکردنەوەی ئەم دوو چەمکە بابەتێکی گرنگمان بۆ ڕوون ئەکاتەوە، یان کارئاسانیمان بۆ ئەکات بۆ تێگەشتنێکی باشتر لەزۆرێک دیاردە و بابەت.
Complicated
مەبەست لەم جۆرە لە ئالۆزی، گرانی ڕاپەراندن یان چارەسەرکردنی کارێک یان کێشەیەکە. هۆکاری ئەم جۆرە لە ئاڵۆزی کەموکورتیە لە توانا و شارەزایی کەسی بکەردا. واتە ئەو کەسەی ئەیەوێت کارێکی دژوار بکات، یان کێشەیەکی ئاڵۆز چارەسەربکات، شارەزایی یان توانای پێویستی نییە. کەموکورتییەکە ئەکرێت زانیاری پێویست بێت، یان هێزی بازوو بێت. بۆ نموونە، من ناتوانم کێشی دووسەد کیلۆ لە سەر زەوی بەزبکەمەوە، واتە کارێکی دژوارە بۆ من. من ناتوانم بە زمانی چینی قسەبکەم، واتە کاریکی ئاڵۆزە بۆ من. بەڵام کەسێکی لەمن بەبازووتر ئەتوانێت دووسەد کیلۆکە لەسەر زەوی بەرزبکاتەوە، واتە کارێکی دژوار نییە بۆ ئەو. ملیۆنان کەسی تر ئەتوانن بەزمانی چینی قسەبکەن، واتە کاریکی ئاڵۆز نیە بۆ ئەوان.
لەم بارودۆخەدا هەموو پرسیاریک یەک وەڵامی ڕاستی ڕەهای هەیە و هەموو وەڵامەکانی تر هەڵەن.
Complex
هۆکاری ئاڵۆزی ئەم جۆرەیان پەیوەندی بە ئاڵۆزیی خودی بابەتەکەوە یان کارەکەوە هەیە، نەوەک توانا و شارەزایی کەسی بکەر. هەرچەندە ئەمجۆرەش لە ئاڵۆزی “مەستەحیل” نییە، بەڵام کارەکە هەرکەسێک بیکات، هێشتا هەر دژوارە. هۆکاری ئەم جۆرە لە ئاڵۆزی زۆرجار پەیوەستە بە فرەڕەهەندیەوە، یان هەبوونی چارەسەری جیاواز لەهەمانکاتدا. گرفت و کێشە سیاسی و کۆمەڵایەتییەکان زۆربەی زۆریان لەمجۆرەن. بۆنموونە، لەکایەی ئابووریدا، پەیوەندیەکی پێچەوانە هەیە لەنێوان، بێکاری و هەڵئاوسانی داراییدا (ئەمە بە بۆچوونی ئابووریناسی نیوزلەندی بیڵ فیلیپس، کە بۆ ماوەی چەند دەیەیەک بە مۆدێلێکی پەسەند دادەنرا). راگرتنی تەرازووی نیوان بێکاریی و هەلئاواسانی دارایی بەم تیگەشتنە کێشەیەکی ئاڵۆزە. هەڵئاوسانی دارایی مەترسییەکی گەورەی ئابوورییە کە زیانی زۆر بە ئارامی بازاڕ و گەشەکردنی ئابووری ئەگەیەنێت، لەکاتێکدا بەرزبوونەوەی ئاستی بێکاریش مەترسییەکی گەورەی ئابوورییە کە ڕیگە لە گەشەکردنی ئابووری ئەگرێت و ئەکرێت کێشەی سیاسی و کۆمەڵایەتیش دروستبکات.
لەم بارودۆخەدا چەند وەڵامێکی ڕاست هەن و ڕاست و دروستی وەڵامەکان پەیوەندی بە بارودۆخ و ڕەهەندی جیاوازەوە هەیە. بۆیە ناتوانی وەڵامیکی ڕەها دەستنیشان بکەین کە لەهەموو بارودۆخێکدا ڕاست بێت. کایەی سیاسی یەکێکە لەو کایانەی کەهەمیشە مامەڵە لەگەڵ کێشەی ئاڵۆز لە جۆری دووەمیان دەکات. بۆیە پارتی سیاسی و ئایدۆلۆژیای جیاواز چارەسەری جیاوازیان هەیە بۆ هەمان كێشەی سیاسی، چونکە لە گۆشەنیگا و ڕەهەندی جیاوازەوە بۆ چارەسەر ئەگەڕێن، یان “ئەولەویەت” ی جیاوازیان هەیە.
بەگشتی ژیان پڕە لە جۆری دووەمی یاڵۆزی. پرسیار و کێشەی ئاڵۆز و دژوار لەم حاڵەتەدا، بە وەڵام و چارەسەری سادە و تاکڕەهەند وەڵام نادرێتەوە و پینە ناکرێت. ڕەنگە ئەمە یەکێک بێت لە جیاوازییە هەرە دیارەکانی مرۆڤی وشیار و ژیر لە بەرامبەر مرۆڤی سادە و ساویلکەدا. وەڵامی زانست بۆ پرسیارە دژوار و ئاڵۆزەکانی مرۆڤ هەمیشە دژوار و ئاڵۆزن، زۆرجاران زیاتر لە خودی پرسیارەکان.
بڵاگی ئاسۆ 